ការធ្លាក់ចុះក្នុងអំពើបាប លោកុប្បត្តិ៣:១-២១

សេចក្ដីផ្ដើម៖រឿង “ស្វាធ្លាក់ទៅក្នុងភក់” មានសត្វស្វាដ៏រប៉ិលរប៉ូច វាតែងតែហក់ពីដើមឈើមួយទៅដើមឈើមួយរាល់ថ្ងៃ រហូតដល់បឹងភក់មួយកន្លែង។ សត្វព្រៃជាច្រើនបានហាមវាមិន

អោយលោតលេងទៅក្នុងបឹងភក់នោះឡើយក្រែងអន្តារាយដល់ខ្លួន ប៉ុន្តែវាជាសត្វស្វាដ៏មានអំនួត វាមិនបានស្ដាប់តាមការហាមឃាត់របស់សត្វព្រៃដទៃផ្សេងទៀត វាបានហក់ទៅក្នុងបឹងភក់មួយនោះ ហើយក៏ផុងជាប់ទៅគ្មានអ្នកណាអាចជួយវាបានឡើយ រហូតទាល់តែមានមនុស្សម្នាក់បានមកជួយវា ហើយវាក៏បានរួចខ្លួនចេញពីភក់ដ៏ស្អិតនោះទៅ។ ដូចជាមនុស្សដែលព្រះទ្រង់បានបង្កើតមកយ៉ាងដូច្នោះដែរ មិនបានស្ដាប់តាមដំបូន្មានរបស់ព្រះជាម្ចាស់នោះឡើយ ក៏បានបណ្ដោយខ្លួនអោយធ្លាក់ទៅក្នុងអំពើបាបដ៏ជ្រៅ ដែលមិនអាចដកខ្លួនរួចឡើយ។

សង្ខេបអត្ថបទគម្ពីរៈ អ័ដាម និងអេវ៉ាបានមិនស្ដាប់បង្គាប់ព្រះអង្គ ដោយស្ដាប់តាមអារក្ស ដោយហ៊ានបរិភោគផ្លែឈើដឹងខុសត្រូវ ដែលព្រះទ្រង់បានហាម ដូច្នោះហើយព្រះទ្រង់បានដាក់ទោសពួកគេដោយសារតែអំពើបាបដែលពួកគេបានប្រព្រឹត្ត។

សំនួរស្នូលៈ តើហេតុអ្វីដែលបានបណ្ដាលអោយមនុស្សធ្លាក់ទៅក្នុងអំពើបាប? និងតើអ្វីជាលទ្ធផលនៃការធ្លាក់ចុះទៅក្នុងអំពើបាប?

តួសេចក្ដី

ក. អ័ដាម និងអេវ៉ាបានធ្លាក់ទៅក្នុងសេចក្ដីល្បួង (ខ១-៧)

· សត្វពស់បានល្បួងអេវ៉ាអោយបរិភោគផ្លែឈើដឹងខុសត្រូវ(ខ១-៥)

· អេវ៉ាស្ដាប់តាមសត្វពស់ហើយអោយអ័ដាមបរិភោគដែរ(ខ៦-៧)

ខ. ការប្រកែកមិនព្រមទទួលកំហុស(ខ៨-១៣)

· អ័ដាមមិនបានទទួលស្គាល់កំហុសរបស់ខ្លួនទេ ហើយថែមទាំងបន្ទោសព្រះជាម្ចាស់ និងស្រ្តីដោយព្រោះខ្លួនបានធ្វើអំពើបាបទៅទៀត។

· ស្រ្តីមិនបានទទួលស្គាល់កំហុសរបស់ខ្លួនទេ បែរទៅជាបន្ទោសពស់ទៅវិញ ដោយសារអ័ដាម និងអេវ៉ាមិនព្រមទទួលស្គាល់កំហុសរបស់ខ្លួនជាហេតុដែលធ្វើអោយព្រះអង្គកាន់តែខ្ញាល់កាន់តែខ្លាំង។

o ឧទាហរណ៍ កាលពីខ្ញុំ(ណារ៉ូ) នៅក្មេង ខ្ញុំមិនសូវចេះទទួលកំហុសនោះទេ ខ្ញុំតែងតែទម្លាក់កំហុសទៅអ្នកដទៃទៀតអោយរងកំហុសជំនួសខ្ញុំ ប៉ុន្តែពេលម្ដាយខ្ញុំដឹងការពិត គាត់វាយខ្ញុំលើសដើម ប្រសិនបើប្រាប់គាត់តាមត្រង់ ប្រហែលមិនអីទេ។ ដូចគ្នាដែរ អ័ដាម និងអេវ៉ាមានឱកាសក្នុងការសារភាពបាប ហើយកែប្រែចិត្តប៉ុន្តែពួកគេមិនបានធ្វើយ៉ាងដូច្នោះឡើយ។

គ. លទ្ធផលនៃការធ្លាក់ចុះទៅក្នុងអំពើបាប(ខ១៤-២១)

· អំពើបាបមានលទ្ធផលរបស់វា អ័ដាម និងអេវ៉ាបានធ្វើបាបទាស់ប្រឆាំងនឹងព្រះជាម្ចាស់ នោះពួកគេនឹងត្រូវទទួលលទ្ធផលដែរ។

· ទំនាក់ទំនងរវាងមនុស្សនឹងព្រះត្រូវបានកាត់ផ្ដាច់(ខ១០)

· ទំនាក់ទំនងរវាងមនុស្ស នឹងមនុស្សត្រូវបានកាច់ផ្ដាច់(ខ១២,១៦) កាលពីមនុស្សស្រីត្រូវជាជំនួយដល់បុរសឥលូវនេះគឺ មនុស្សប្រុសត្រួតត្រាលើមនុស្សស្រី

· ទំនាក់ទំនងរវាងមនុស្សនឹងធម្មជាតិត្រូវបានកាច់ផ្ដាច់ មនុស្សធ្លាប់ស៊ីផលពីធម្មជាតិឥលូវនេះ មនុស្សត្រូវធ្វើការងារហត់ណាស់សម្រាប់រស់នៅ(ខ១៧-១៩)

· ប៉ុន្តែទ្រង់បានសន្យានឹងនាំការផ្សះផ្សារដល់មនុស្សវិញ(ខ១៥)

o ឧទាហរណ៍ វាប្រៀបដូចជាឪពុកម្ដាយដែលកូនលែងស្ដាប់បង្គាប់ហើយ ដាច់ចិត្តដេញកូនចេញពីផ្ទះ កាត់កាលចោលអញ្ចឹង

សេចក្ដីបញ្ចប់

សរុបសេចក្ដីៈ ដោយសារអំពើបាបបានធ្វើអោយទំនាក់ទំនងដ៏ល្អឥតខ្ចោះពីមុនត្រូវបានកាច់ផ្ដាច់ មនុស្សដែលធ្លាប់មានទំនាក់ទំនងល្អជាមួយនឹងព្រះត្រូវបានកាច់ផ្ដាច់ ទំនាក់ទំនងជាមួយនឹងអ្នកដទៃទៀតក៏លែងល្អដូចមុន មនុស្សបំផ្លាញធម្មជាតិដែលព្រះអង្គបង្កើតមក ហើយក៏មានអ្នកខ្លះសម្លាប់ជីវិតខ្លួនឯងដែលព្រះអង្គទ្រង់ផ្ដល់អោយ។

ទេវសាស្រ្តៈ ព្រះជាម្ចាស់ៈ ព្រះជាម្ចាស់ទ្រង់បរិសុទ្ធទ្រង់ត្រូវតែជំនុំជម្រះអំពើបាប ប៉ុន្តែទ្រង់ក៏ពេញដោយព្រះគុណដែរ ទ្រង់បានសន្យាថានឹងបំផ្លាញសាតាំង និងផ្សះផ្សារទំនាក់ទំនងដែលបាក់បែកអោយបានល្អប្រសើរឡើងវិញ។

ព្រះគ្រីស្ទវិទ្យាៈ ព្រះអង្គទ្រង់មិនព្រងើយកន្តើយចំពោះបញ្ហាទាំងនេះឡើយ ទ្រង់បានចាត់ព្រះរាជបុត្រារបស់ទ្រង់មកសង្គ្រោះមនុស្សអោយរួចពីបាប(យ៉ូហាន៣:១៦) ហើយមកផ្សះផ្សារទំនាក់ទំនងរវាងមនុស្សជាមួយនឹងព្រះជាម្ចាស់វិញដោយទ្រង់សុគត បង្ហូរព្រះលោហិតនៅលើឆ្កាងដើម្បីនាំការផ្សះផ្សារដល់មនុស្សទាំងអស់(អេភេសូរ២:១៦, កូលុស២:២០-២២)។

មនុស្សៈ មនុស្សពោរពេញដោយអំពើបាប(រ៉ូម៣:២៣) តែងតែបះបោរ ប្រឆាំងនឹងព្រះជាម្ចាស់ ហើយត្រូវកាច់ផ្ដាច់ទំនាក់ទំនងជាមួយនឹងព្រះអង្គដោយសារតែអំពើបាប។

ការអនុវត្តៈ ការផ្សះផ្សាររវាងមនុស្សមានបាប និងព្រះជាម្ចាស់មិនទាន់បញ្ចប់នោះទេ ព្រះយេស៊ូវគ្រីស្ទទ្រង់បានផ្ទេរការងារផ្សះផ្សារនោះទៅមនុស្សបន្តទៀត ជាអ្នកដែលជឿ និងដើរតាមព្រះអង្គ។ ដូច្នេះក្នុងនាមយើងជាគ្រីស្ទបរិស័ទ យើងមានតួនាទីក្នុងការផ្សះផ្សារអ្នកដែលមិនទាន់ស្គាល់ព្រះអង្គ អោយមានទំនាក់ទំនងជាមួយនឹងព្រះជាម្ចាស់វិញ នេះគឺជាបេសកកម្មរបស់យើង(១កូរិនថូស៥:១៨-១៩)~~[full-sidebar]~~។